volver

 

Saâdita y Mosse

 

Por Sonia  Benelbaz de Binisti

 

 

- Mosse : Saâdita, a Saâdita, Saâdita, ande se uardejo tamien ?

 

- Saâdita : Alaquime, alaquime a Mosse, fervete corchete ! Me puzzi la saya, que es este mal ? Ewa corre que te corre, pa no gennearte, me se cojjo el cherbil de la landra con la stera y me hiba a sh'albar. Eso me falto, ghar el Dio que mescapo !

 

- Mosse : Na ya mal, na ya mal, salida del mal, quien te lo quijjere. Wa halaqui esta silleta y sentate cabe mi te contare mis kaharas

 

- Saâdita : Negra, negra a mosse, aumestas lloriqueando ? Yak el mesghob de Haquito te hizzo una âmla ?

 

- Mosse : Porque Haquito namas ? Ya te dishi quel que no tiene mazzal, todo se le entorta

 

- Saâdita : Wa l'Dio apiadara a mi rey, el Dio apiadara

 

- Mosse : De tu boca a los cielos y que los saddikim mos fuqqueen. Amen. Volvo y digoy, ese mamzzer de Haquito, alek, se quiere ir a Jeres, y ande stan los chabos que me hiba a prestar ?

 

- Saâdita : Pa mercar el bacalito del hijjo de Hbibi ?

 

- Mosse : Si a imma, walu, me voy a quedar shemshando alhenia. Y para colmo, ba a levar con el, el tartushado de Flal'lo, el qui mos hiba a encalar la cazza pa pessah

.

- Saâdita : wili, wili, quien mal'logrado mos encalara por ese precio ?

 

- Mosse : Tu stas jamando gher en encalar, mira baâda como vamos a comer un bocado ! La tiendesita de bappa, la meknei a Yusito, batata berta, gher pa mercar el bacalito con los chabos luzzidos del hijjo de la negra de Haquito, ewa bay ! Me quedi "ni juan, ni juanito", no sepamos de mal.

 

Saâdita : boy anseder el bazzito de Rbi Mier, y que mos habra las cuertas de luz ! Tamien boy a levar hazzeite a snoga. Asperame, me luffare con la shalina y dare un volo hatta la snoga

 

(Despues de un rato)

 

- Saâdita : Ya volvi a Mosse

 

- Mosse : ai, ai, ai, todo eso ? Me spanti por ti, nossa que te jatfaron, au que un melôk te bushco algun mal ?

≈≈≈≈≈≈≈≈

- Saâdita : calla, calla, mos bushque gher lo ueno ! M'encontri con Hol'lita le de Rifi. La pregunti por Semuel, el del capote, sabes que pozza cabel. Wa me conto que se le huzzeo el mazzal, ansi se le huzzee a todo hijjo de jjudio. Alek, el jajam de la snoga de Ruben, le merco un decimo de loteria pa purim. Wa no sabras como le almeo el Dio y alaqui que gano una guezzera. Wa merco una farajjia endiamantada, unos sherbiles de los fasiin, dos boinas y la regalo a Hol'lita una meherma  con flecos de seda que te dara vicio ! Au le quedda una mattana ! Alek no s'echa la noche hadando las paredes y la cuerta, no sa que los ladrones  le den una treha pa levarle los chavos. L'amargo, se kefsheo, te dara manzzia verle. Me disho que los sabbades k'aila doreando las cazzas, a âlfearse de dafinas, pamor que los caidos el mazzal de los ladrones se jammen que sta seco y ueco, sin un realito. Mira a Mosse, mi uenobay fuqqueale. Jjorrale esos chabos y de un tiro mataras dos pasharos. Semuel, se muddara a pata suelta sin ningun remo que le reme, y tu a ferasmal, mercaras el bacalito. Dile que se hara socio de Mosse el misvotero. Ansina bos wansaris los dos en el bacal, y no staras solo como el mesoraâ. Baâda no me spantare por ti, si vino un sajen pa degollarte y levarte los 4 chavitos.

 

- Mosse : Lores al Dio por ti a Saâdita, mi reina, los ojjos de mi cara, mi shrifa, te quedes viva y sana, daca te hechare misaberaj, me sacates de una uahla ... addeque de grande ! Wa parejja unas belas y bamos awera corriendo à zzorear al saddik valido Rebbi Yuda Jabali.

 

©  Sonia Benelbaz de Binisti, 2013

≈≈≈≈≈≈≈≈

 

 

volver